محه‌مه‌د مراد
قووناغێن سه‌خت یێن كوردایه‌تیێ مه بدوماهیك ئینان، ده‌مێ كورد و ملله‌ت د ته‌نگاڤیێن بێ وێنه دا، مه كوردایه‌تی دكر و دوروشمێن ئازادی و ده‌وله‌تبوونێ ژ ئه‌سمانێ كوردستانێ دبارین، ژ لایه‌كی ڤه خۆین دباری و ژ لایه‌كێ ڤه؛ كوردایه‌تی دباری و مه پێ خۆش بوو و ئه‌م سه‌رفراز بووین، به‌ر سینگێ نه‌حه‌ز و دوژمنان مه دگرت، چنكو د دلێ مه دا ئارمانجه‌كا پیرۆز یا ده‌وله‌تێ مه هه‌بوو، خه‌بات بۆ دهاته‌كرن، قه‌د خه‌م نه‌بوو، بهێنه كوشتن یان سێداره‌دان، ئاواره ببین و برسی ببین یان ب ساخی بنئاخ ببین هند كوردایه‌تی شرین و خۆش و گه‌رم بوو، مه های ژ مال و قه‌سر و ناڤمالی و خودانكرنا زارۆكان نه‌بوو، ب هیڤییا خودێ ڤه هێلابوون، ل سه‌ر خاترا كورددایه‌تیێ.
لێ سال چوون و سال هاتن، یا ل مه دبیته خه‌ون و ئه‌و چ بوو؟! یان ئه‌و چ هه‌ست و دلسۆزی بوو، د ناڤ ته‌ڤایا ملله‌تی دا هه‌ی و هه‌بوو، ئه‌و هه‌ست و دادپه‌روه‌رییا سه‌رجه‌م سه‌ركرده و هێزێن سیاسی بووم ل ده‌مێ كو هند باوه‌ری د ناڤ ناخ و ده‌روونێ تاكێ كورد دا چاند بوو، كو ب هه‌یڤ و شه‌ڤ و رۆژ چاڤه‌رێ بین و برێڤه‌بچین دا بگه‌هین سه‌نگه‌ره‌كێ خه‌باتێ پێشمه‌رگایه‌تیێ تێدا بكه‌ین، وه‌ك خۆبه‌خش بێ مووچه و هیچ ئیمتیازه‌ك، ئه‌ڤرۆ ئه‌و هه‌ست و باوه‌ری هند لاواز بووینه و به‌ره‌ف و به‌رزه‌بوونێ ڤه دچن، چنكو یا مه دڤییا وك مه لێ نه هاتیه!
به‌رژه‌وه‌ندی هاتینه پێش و وه‌سا د ناڤ ده‌زگه‌هێن حزبی و له‌شكری و ئیداری دا، جهێ خۆ گرتینه، قه‌د مرۆڤ هه‌ست ب كوردایه‌تیێ نه‌كه‌ت، وه‌سا خه‌لك هزر دكه‌ت، كوردایه‌تی یا خلاس بووی، تنێ ئه‌وا نوكه هه‌ی؛ ئاڤاكرنا به‌رژه‌وه‌ندیێن كه‌سۆكینه، كه‌سێن ئێكێ ئاگه‌هی پرۆژه‌یێن وه‌به‌رهێنانێ و سه‌روه‌ت و سامانی خۆنه، ئاگه‌هی پاقژیا خزمه‌تكرنا ملله‌تینه ماینه، چاڤ ل به‌رژه‌وه‌ندیێن كه‌سۆكی بووینه، ئه‌ز ببم خودان ئابۆره‌كێ باش هه‌ما ئه‌و گرنگه، داهات و سه‌روه‌ت و سامانێ من به‌هرا نه‌ڤی چڕكێن من هه‌نه، قه‌د بیر ل ئایندێ وه‌لاتی ناكه‌ن، هزر ناكه‌ن شه‌ڤ و رۆژه‌كێ دا هه‌می سه‌روه‌ت و سامانێ وی دێ ب ئاڤ دا چیت، ئه‌گه‌ر مه سه‌ربه‌خۆییا وه‌لاتی نه‌بیت، چاڤ بده‌ن (غه‌زه و ره‌فه‌ح) د ناڤبه‌را چه‌ند رۆژه‌كان دا هه‌می مۆل و مۆتێل و تاوه‌ر و خانی و مه‌زره‌عه‌یێن وان ب سه‌ردا هه‌ڕفاندن، خۆ كه‌س نابێژیت (ته‌حم) ژی بۆ وان سه‌خمه‌راتی هه‌بوونا پتر ژ 22 ده‌وله‌تێن عه‌ره‌بی كوهه‌ڤپشك و برایێن وانن، لێ كه‌س د هه‌وارا وان نه‌چوو و نه‌وێرن، ده‌ستێن وان یێن ل به‌ر سه‌رێ وان، به‌رێ خۆ بده‌ن لوبنان و كا چ هات سه‌ری (حزب الله) و چ هاتییه سه‌رێ گوند و باژێرێكێن لۆبنانێ؟ خرابكرن و سۆتن، به‌رێ خۆ بده‌ن یه‌مه‌نێ ده‌وله‌ت و خودان سه‌روه‌ری و ئالا، كو حوسی بووینه ئه‌گه‌رێ هندێ ئه‌مریكا ب هه‌می هێزین خۆڤه ژێرخانا ئابۆرییا یه‌مه‌نێ ژ ناڤبرن و باژێرێن وان ب سه‌رێ وان دا هه‌ڕفاندن دبیت ئه‌م، یێ د مه‌ترسی و شاشیه‌كا مه‌زن دا، دڤێت ئه‌م هزر نه‌كه‌ین ئه‌م یێن گه‌هشتێن ئامانجا دوماهیێ، دبیت هێشتا خالا سفڕێ بیت یان خالا سفڕێ ده‌ست پێ ب كه‌ین ڤه، ئه‌ڤا نهو تشتێن (لاوكینه)، نه زێده‌تر، پڕۆژه،كۆمپانی، تاوه‌ر. سویك و بازِار بۆ ئامانجان گه‌هشتن ب ده‌وله‌تبوونێ بێ مه‌فانه، د ناڤبه‌را شه‌ڤه‌ك رۆژه‌كان دێ ب ئاڤ داچن.
