دیدار: هه‌لز عه‌لی سه‌لیم
سالح ئه‌رتیسی ل سالا 1998 ده‌ست ب نڤیسینا هه‌لبه‌ستێ كریه و تا نوكه سێ به‌رهه‌مێن چاپكری هه‌نه، ل نێزیك دێ دوو به‌رهه‌مێن دیتر به‌لاڤ كه‌ت.
– تە كەنگی دەست ب نڤیسینا هۆزانێ كریە و هەتا نوكە تە چەند بەرهەم هەنە؟
سالا ١٩٩٨ من هەلبەستا ئێكی نڤیسیە، لێ ل سالا ٢٠٠٣ ب دروستی من دەست ب نڤیسینا هەلبەستێ كر بۆ بەرهەمێ ئێكێ، تا نوكە سێ بەرهەمێن هەلبەستا من هەنە و پەرتووكەكا مێژوویی و یێن نە چاپكری ژی ئێكا هەلبەستا و ڤەكۆلینەك.
– بۆچی تە نڤیسینا هەلبەستێ هەلبژارت و چ تایبەتمەندی لدەڤ تە هەنە؟
هەلبژارتنا هندەك رێكا ب دەستێ مرۆڤی نینە، خوداییە، هەلبژارتنا نڤێسینا هەلبەستێ ئێك ژ وان رێكا بوویە، دەرد و ئێش و ئازارێن مالا من وەك مالێن هەر تاكەكێ كورد، رەڤین و هێلانا وەلاتی و تالان و كوشتن و سۆتاندنا مالا و ئەنفال، پتر بوونە ئەگەر كو هەلبەستێ بنڤیسم، ژبه‌ر ل ئەنفالێن رەش یێن سالا ١٩٨٨ ێ دەمێ مالا مە بەرەف توركیا چووی و ل كەمپا مووشێ ئاكنجی بووی ل وان سێ چار سالا پتری ٧ كاسێتێن شۆرەشگێری ل مالا مە هاتنە تۆماركرن و وی دەمی ئەز زارۆك بووم لێ كارتێكرنا خوە ل سەر من دكر، دبیت ژی پتر ژبەر هندێ حەزا من بۆ نڤیسینا هەلبەستێ چ بیت، دیسان ژ لایەكێ دیڤە ژێ كورترین و بەرچاڤترین رێكە كو مروڤ ئێش و ئازارێن خوە پێ بگەهینیت.
– نڤیسینا هۆزانێ پێدڤی ب هەستان دكەت یان بتنێ دەربڕینە؟
دبیت هەر كەسەكی بۆچوونەكا جودا هەبیت، لێ بۆچوونا من ئەگەر هەست نەبن دەربرین تێرا نڤیسینا هەلبەستێ ناكەن ژخوە نڤیسنا هەلبەستێ هەمی هەستە پاش دەربرین و دەركرن.
– كیش ڕەنگێ هۆزانێ دنڤیسی و بۆچی؟
ئەز پتر هەلبەستا ئازاد یا سادە د نڤیسم داكو هەر كەسەك ب ساناهی خوە تێدا ببینیت، پتر دلداری و نیشتمانی و رەخنەی ژی د نڤیسم وهەمی پرتووكێن ئەڤ سێ رەنگێن هەلبەستا تێدانە.
– چ جوداهی د ناڤبەرا هەلبەستا ئازاد و یا كلاسیك دا دبینی و تو خو ل كیڤە دبینی؟
ئەز باوەرم هەلبەستا ئازاد ب ساناهیترە ژ یا كلاسیك بو نڤیسنێ، هەلبەستا كلاسیك گەلەك بنەما د كێش و سەروایێ دا هەنە و تاكو وان هەمی بنەمایا ل سەر ئێك هەلبەست جهبەجهـــ دكەی هەم پێدڤی شارەزاییەكا باشە و هەم دەمی گەلەك د بەت. یا خوە دیتنێ.. ئەوێ خوەێندەڤان دێ حوكمی ل سەر دەت كا ئەز ل كیڤەمە.
– تە بەرهەمێن نوی هەنە یان نە؟
بەلێ، ئێك ل ژێر چاپێ یە و ئێك یا نە چاپكریە دگەل كومەكا هەلبەستێن دی.
– تە خەلات هەنە و ل كیڤە وەرگرتینە؟
بەلێ چەندین خەلات و رێزلێنان، من خەلات ل پترا باژێر و باژێركێن كوردستانێ یێن وەرگرتین
ل هەڤلێرا پایتەخت ل زاخۆ و دهۆك و ئامێدی و سرسنك و دێرەلۆك و شێلادزێ.
– د ناڤبه‌را هه‌لبه‌ستێ و كارێ نڤیسینێ دا چ جوداهیێ دبینی؟
هەلبەت گەلەك جوداهی یێت هەیين ب دیتنا من هەمی هەلبەستڤان نەشێن ببنە نڤیسەر لێ پتریا نڤیسەر ا د شێت ببیتە هەلبەستڤان و هەلبەست دەربڕینەكا تایبەتە ژ ئێش و ژان و كەیفخوەشییا، لێ نڤیسین نە تنێ دەربرینە، بەلكو ڤەكۆلین و دویڤچوون و خواندن و لێگەریان و پشتراستكرن و هندەك جادا حەزە و هندەك جارا كەرب ب دیتنا من.
– تە چ هەیە بۆ هۆزانڤانێ گەنج بێژی؟
بلا بزاڤێ پتر خوە پێبگەهینیت و پتر ل سەر هەلبەستێ ب خوینیت و شیانێن خوە پتر گەشە بكەت و چ جاران بەرهەمی یان هەلبەستێ نە نڤیست بۆ پەرتالەكێ دونیایێ.
