محه‌مه‌د مراد
كورد د مێژوویێ دا برایێن ئێك بوون، چو ده‌م و زه‌مانان باژێر و باژێر بشه‌ر نه‌چووینه، سۆڕانی و به‌هدینی ب شه‌ڕ نه‌چوونه، عه‌شیر و عه‌شیرێن كوردان ب شه‌ڕ نه‌چوونه، پێكڤه د سه‌نگه‌رێن به‌رخودانێ دا بوون، به‌رگری ژ خاك و نیشتمانێ كوردستانێ كرینه، د شۆره‌شێن بزاڤا رزگاریخوازا كوردی دا، د ئێك چه‌په‌ر دا پێشمه‌رگه‌بوون و پێكڤه شه‌هیدبووینه و پێكڤه ئه‌نفال بووینه، چو ده‌مان دوژمنان جوداهی د ناڤبه‌را كوشتنا وان دا نه‌كریه، چنكو كوردبوون دكوشتن، سێداره ددان، زیندان دكرن.
پشتی سه‌رهلدانا هنده‌ك كه‌سێن سنێله، هیچ و پیچ ب ناڤێ سیاسه‌تێ هاتینه مه‌یدانێ، برا ل برای كریه نه‌یار، باژێر ل باژێری كرینه دوژمن، ئه‌ڤ پیساتی و نه‌ڤیانه تێكهه‌لی وه‌رزشێ ژی كرینه، بۆ مه‌ره‌مێن خۆ و هاندانا جه‌ماوه‌ری ل ده‌وروبه‌رێن یانه و باژێرێن خۆ بۆ مه‌ره‌مێن سیاسی وه‌رزش بكارئینایه، بۆ تێكدان و شكاندنا جه‌ماوه‌رێ ڤی باژێری ل دژی جه‌ماوه‌رێ باژێری دی. تنێ بۆ مه‌ره‌مێن سیاسی و خاپاندنا جه‌ماوه‌رێ وه‌رزشی و قورغكرنا وان بۆ ڤی لایه‌نی و لایه‌نێ دی.
ده‌مه‌كێ ل گونده‌كێ بیره‌كا ئاڤێ هه‌بوو،گه‌له‌ك كویربوو، خه‌لكی (سه‌تل) ب وه‌ریسا ڤه دكرن، داهێلا بنێ بیرێ و ئاڤ دئێنا ده‌رێ، ده‌مه‌كێ هه‌ر كه‌سێ چووبا ئاڤێ سه‌تل دا هێلا بیری، ده‌مێ وه‌ریس دكێشا سه‌ته‌ل پێڤه نه‌بوو، خه‌لك ما بێ ئاڤ گوندی كۆمبوون،كی دی چیت بنێ بیری سه‌حكه‌ت كا ئه‌و چی یه د بنێ بیرێ دا، گه‌نجه‌كێ زیره‌ك گۆت ئه‌ز دێ چم مه‌رجه‌كێ برایه‌كێ من ژی بینن ده‌ڤ خۆ، گوندییان گۆت ئه‌م هه‌می برایێن ته، گۆت دزانم مه‌رجێ منه برایه‌كێ من ژی ل گه‌ل وه‌بیت، چوون برایه‌كێ وی ئینان، ده‌ف بیری، ئه‌و گه‌نج ب وه‌ریسان گرێدا و دا هێلا بنی بیری و چه‌ند كه‌سان وه‌ریس گرتن برا ژی دگه‌ل دا، كۆڕك داهیلا بنێ بیرێ كویربوو و تاری ژی، كۆركی به‌رێ خۆ دایێ مه‌یمینكه‌ك یا ل بنی بیرێ هندی سه‌ته‌ل د ئاڤیتنن بنێ بیرێ، مه‌یمینكێ سه‌تل ژ وه‌ریسی ڤه دكر. كۆركی مه‌یمینك گرت دا به‌ر سینگێ خۆ. ب ده‌نگێ بلند گۆت: وه‌ریسی بكێشن، گوندییا وه‌ریس كیشا هه‌تا كۆڕك نێزیكی ده‌رێ بیرێ بووی، مه‌یمینكێ خۆ هه‌لاڤێت ده‌رێ بیرێ، گوندی هه‌می ژ ترسا بزدیاین وان هزركر ده‌هبه‌كا یان ئه‌جنه‌كه وه‌ریس به‌ردان ژ ترسا دا، تنێ برای وی مابوو وه‌ریس نه‌به‌ردا.
ئه‌ها برایه‌تی هۆسانه ئیللا برا ل پشت برای بیت، ئه‌ڤجا برایه‌تیا كوردان بناڤێ وه‌رزش و سیاسه‌تێ تێكنه‌دن، كه‌یفا دوژمن و نه‌حه‌زان ل مه نه‌ئینن، بلا حزبێن سیاسی نه ئێك رێزبن، به‌لێ ملله‌تێ كورد چو ده‌ما نابت برایه‌تیا خۆ تێكبدن، نه بۆ وه‌رزشێ و نه سیاسه‌تێ… بژی كورد.
