محه‌مه‌د مراد
گونده‌كێ بیست مالی بوو، ل ده‌مێ به‌رێ دا پێلاڤ ژی نه‌بوون، به‌هرا پترییا مرۆڤێن گوندی پێخاس دگه‌ریان نه د شیان چ ل پێن خۆ بكه‌ن، كابرایه‌كێ كالكه‌كا چه‌رمێ گای چێكربوو، گه‌له‌ك جان دووری بوو، دكره پێ خۆ و ل ناڤ گوندی پێ دگه‌رییا هه‌ر وه‌ك تشته‌كێ سه‌یر، هند كه‌یڤ پێ دهات و پێ شادبوو.
كابرایه‌كێ گۆت دێ خودێ كه‌ریمه ئه‌ڤ شه‌ڤه دێ كالكا وی دزم ناهێلم تو پێ شاد بی، ته‌كه‌یف پێ نه‌كر، كابراێ كالكێ، كالكا خۆ دانابو و به‌رده‌رگه‌هی ژ ده‌رڤه، بوو شه‌ڤ چوو كالكا كابرای دزی، سپێدێ ژ خه‌و رابوو ب كه‌یف بوو، دا چیت كالكا خۆ كه‌ته پیێن خۆ كو ل ناڤ گوندی بگه‌ریت، نه هه‌رێ ل كالكێ گه‌ریا كالك نه دیت، گه‌له‌ك تووڕه‌بوو، چوو سه‌ربانی كره گازی و قێرین یێ كالكا من نه‌زڤرینیت دێ ڤی گوندی سۆژم.
كابرا یێ كالك دزی گۆت دیاره ئه‌ڤی ئه‌ز یێ دیتیم و من ناس دكه‌ت، بوو شه‌ڤ كالكا جامێرێ زڤراند دانا به‌ر ده‌رگه‌هی، سپێدێ رابوو كالكا وی یا ل به‌ر ده‌رگه‌هی؛ گه‌له‌ك كه‌یفا وی هات، كالكا خۆ كره پێ خۆ؟ چوو ناڤ گوندی، كابرا یێ كالك دزی چو ده‌ڤ خودانێ كالكێ، گۆت: وه‌ی ل سه‌ر خێرێ بیت كالكا ته زڤراند، گۆت ئه‌رێ ب خودێ كالكا من هات، گۆت كابرا یێ خودانێ كالكێ دا چ كه‌ی ئه‌گه‌ر كالكا ته نه هاتبا؟…گۆت دا چ كه‌م؟ باوه‌ربكه ئه‌ز ژی دا وه‌كێ وه هه‌میان پێخاس گه‌ریم، كابرا یێ كالك دزی، ئه‌رێ هه‌رێ من گۆت دیاره دا گوندی سۆژی.
هۆسا ب هیڤیا ئیراقێ ڤه‌بیت، چه‌ند بكه‌ین قێرین و گازی بێ مفایه، هه‌ما دێ پێخاس گه‌رین گه‌له‌ك باشتره، ئه‌و ناترسن و باش مه نیاسن ژ سالا 1992 ئێكرێزی د ناڤ مالا كوردی دا چێ نه‌بوویه، ئه‌و ژی بۆ خو ب ده‌رفه‌ت دبینن، كو كورد د باشورێ كوردستانێ نه ئێكرێزن، و نه‌شێن ئیداره‌یا خۆ بكه‌ن و باره‌كێ قورسی ئه‌گه‌ر بریارێن نه‌ته‌وه‌یی بده‌ن، هێشتا برینێن 16 ئوكتۆبه‌رێ ساخ نه بووینه، سال بۆ سالێ بارێ ئیراقێ و ناڤمالیا ئیراقێ یا باشتر و بهێزتر دبیت، ئه؟ جا نوكه دانا مووچه‌ی دكه‌ن كارت ل سه‌ر هه‌رێمێ و هێدی هێدی دێ ئازۆقه‌ی و گه‌له‌ك تشتێن دی یێن ئابۆری ل سه‌ر مه كه‌نه كارتێن فشارێ، قه‌د باوه‌ر نه‌كه ئه‌و كالكا مه ب ده‌ستێ خۆ دوری و پێ شاد بووین، جاره‌كا بزڤریته‌ڤه و ئه‌م پێ شاد ببین وه‌كی سالێن به‌ڕی هاتنا داعشێ، چنكو ئیراق مژویلی ئافاكرن و بنیاتنانا ده‌وله‌تا ئیراقێنه.
هه‌ر چاوا بیت ده‌وله‌ته و پشته‌ڤانین ده‌هه‌لی و نیڤنه‌ته‌وی هه‌نه، كوردان ئیراقا مفلس ئاڤاكر و كرنه ده‌وله‌ت، ئه‌م د ڤی سه‌روبه‌رێ ئابلۆقا ئابۆری دا نه‌شێین هه‌ڤڕكییا ئیراقێ بكه‌ین، تنێ ئه‌گه‌ر ئێكرێزییا كوردی ل باشۆری چێ بیت ل وی ده‌می دبیت گوهۆرین ل هه‌لوه‌ست و بریارێن نه‌ته‌وه‌یی دا هه‌بیت.
