زوهێر کورەمارکی
وەرگێران ژ عەرەبی
ئەگەر تۆ دگەل کەڕی ب ئاخڤی دێ بووتە گەلەک راستی دیاربن. چاڤپێکەفتنا من دگەل کەڕی ئاخفتنێن پڕی حیکمەت و ب ترس دیاربوون.رۆژەکا گەلەک سرۆشتی بوو، دەمێ من بڕیار دای ئەز ژناڤ قەڕەبالغا باژێری دەربکەڤم، چونکی من حەز ژ گازیا سیاسەتمەدارا و شیرەتێن راسپاردیان و گۆتارێن شرۆڤەکارا و دڕەو و ئاخفتنێن وان کەسان ئەوێن گۆتنێن ب حیکمەت دبێژن نەدکر، ئەز لڕاستیا دگەریام خۆ بلا بۆ خۆلەکەکێ ژی بیت. ئەز گەھشتمە زەڤیەکا پڕی گیا من کەڕەک دیت یێ گرێدایە ب دارەکێڤە، من خۆ نێزیککر، ئەز نزانم بۆچی؟ ھندەک تشتا دچاڤێن ویدا ئەز راکێشامە خۆ و من ھزرکر یێ من داخاز دکەتە دانوستاندنەکا بێ دەنگ! ئەز لسەر بەرەکی لنزیکی وی روونشتم و من گۆتێ: ھۆ ھەڤالۆ خەلک بتە دکەنە کەنی و دبێژنە تە تۆ یێ بێ ئاقلی! ئەرێ راستە تۆ یێ ھوسانی؟ گەلەک بەرێ خۆ دامن، پاشی سەرێ خۆ ھێدی ھژاند، دابێژی یێ دگڕنژیت، گۆت: من چ جارا داخاز نەکریە ئەز یێ بئاقل و زیرەک بم؟ وەلێ چ جارا ژی ئەز دڕەوا ناکەم و خیانەتێ ژی ناکەم و من دژیانا خۆدا کەسەک ژی نەئێشاندییە؟ ئەرێ بێ ئاقلی ئەوە وەکی ئەز ھەیم و ئەز یێ ھوسا؟یان ژی ئەز خۆ چەند روو بکەم، یان وەکی ئەز ھەیم و ئەز ئەز و ھەر وەکی خۆ بم ؟کیژان باشترە؟من گۆتێ :ئەرێ ما تۆ ماندی نابی ژڤێ ھەمیێ ژبێدەنگیێ و ژبارۆ ژخەما؟ سەرێ خۆ ھەژاند و گۆت: وەستیان یان ماندیبوون پارچەکە ژ ژیانا من، وەلێ من نائێخیت و نەخۆشی و دەردەسەری مرۆڤی ناکوژن ئەگەر مرۆڤ خۆ دگەل ب گۆنجینیت و قەبوول بکەت.لێ وی دکوژیت یێ ب دڕەوا بەرگریێ ژێ دکەت، ئەز یێ فێربوویمە بێدەنگییێ و باڕێن گران، لێ ئەز نە فێربوومە غەدڕۆ خیانەت و تەماعييێ ،ئھا ئەڤە سەربلندییا منە. من گۆتێ پا رەئیا تە بژیانێ چیە؟ گۆتی ژیان یا بساناھی نینە. لێ دڤێت مرۆڤ زەحەمەتیا ژیانێ وەلێنەکەت لسەر گۆھێن مرۆڤی ببیتە گۆڕگ. ئەز کەڕم لێ ئەز کەسێ ناخۆم و فێلا لکەسێ ژی ناکەم ل چ پلەو مەنسبا ژی ناگەڕم و کەڕبێن من ژ کەسێ ژی ڤەنابن؟ من گەلەک ھزر دگۆتنێن ویدا کرن، گەلەک سەروچاڤ ھاتنە بیرا من، زەلامێن ئایینی دەمێ بەحسێ خۆشکاندنێ دکەن ،لێ ناھێلن کەس رەخنێ لێ بگرن! سیاسەتمەدارێن بناڤێ گەل و مللەتی دئاخڤن و گازی دکەن، لێ خێڕۆ خێڕاتێن وەلاتی دخۆن و د دزن، گەنج ب کەڕا دکەنە کەنی لێ ئەو خۆ نانیاسیت و نزانیت ژکیڤە دھێت و دێ کیڤەچیت؟ من پرسیار ژێکر ئەرێ تە ئەڤینی کریە؟ کەنیەکا سڤککر،و گۆت: من گەلەک یاکری، من یا حەز ژ وێ ئاخێ کری ئەوا ئەز لسەر ژیاییم و لسەر برێڤە دچم ومن حەز ژ وان کەسا یا کری ئەوێن لمن دبۆرین، وەختێ ئەز ئێشاندیم، من حەز ژ وان یا کری ئەوێن ئاڤ دایەمن بێی پرسیارا ئەسل و فەسلێ من بکەن. ئەڤین نە ئەوە ئەوا ھوین دناڤ ستران و لاڤژێن خۆدا بەحس ژێدکەن. ئەڤینی ئەوە ھوون دوەفادار بن حەتا ھوون ژبیر ژی بکەن، ھوون دنەڕم بن ژی حەتا ھوون خەلەت تێبگەھن ژی. من گۆتێ: تۆ حەز دکەی تۆ تشتەکێ دیبای؟ ھەکە ب منبا و بمن بیت ئەز حەز دکەم ھەر ئەز ئەز بم، ئەز حەز ژ چاڤێن مرۆڤا ناکەم ئەوێن بەس سەڕۆ چاڤا دبینن و حەز ژ جەوھەری ناکەن و ژبیر دکەن. ئەز حەز ژ ناکۆکییێن وان ناکەم ئەوێن ژ پەیڤەکێ دەست پێدکەن و دوماھیکێ دبیتە شەڕۆ خوین رێشتن.
ئەز کەڕم خۆ و سەروچاڤێن خۆ ناگوھۆڕم ئو ئەزمان و ھەڵویستێ خۆ ژی. یێ من بنیاسیت من باش دنیاسیت. ئەز بێدەنگ بووم نەشیام چ ل ئاخفتنێن وی زێدە بکەم، پاشی لمن زڤڕی و گۆت:بەس پرسیارا خۆ بکە کا بۆچی تۆ نەمای مرۆڤ؟ ئەز ژ جھێ خۆ رابووم من کارێ چۆنێ کر، گۆتە: من ئەرێ تۆ ل راستیێ دگەری؟ چێدبیت ھندەک جارا لھندەک جھا تۆ بب
ینی کو قەت ئەو ھزرتە نەکربیت دێ لوێرێ بینی.چێدبیت تۆدبەریکەکێ دا یا د پاخلا ھەژارەکی دا یان دکەڕەکی دا ببینی! من گەلەک بەرێ خۆ دایێ و خۆ بۆ چەماند و برێز گرتنڤە و ئەز چۆم. بۆ من ھوسا دیاربوو کو من چاڤپێکەفتن دگەل چ کەڕا نەکریە ،بەلکو من یا دگەل وژدانەکا پاقژو زەڵاڵ کری،گەلەک تشت نیشا من دان،ژ وان پتر بوون یێن من ژ ژیانی وەرگرتین و ژێ فێربوویم
