نڤیسین: خەبات کرم رشید
زانکویا جیهان-دهۆک
بەشێ پەروەردا گشتی
زانکو ئێک ژ ناڤەندێن هەڕە گرنگە ل سەر ئاستێ جیهانێ، ژبەر کو داینەمویا پێشکەفتنێ یە، د هەمی بوارێن ژیانێ دا. قوتابی ئەو کەسە یێ د زانکویێ دا بەرهەڤ ژ بۆ گەهشتنا ئاستێ هەرە بەرز یێ پێگەهشتنێ و تێگەهشتنێ ل سەر ئاستێ جڤاکی، ژبەر ڤێ ژی پێتڤیە قوتابی زۆر ب بەرپڕسیارانە هەولا پێگەهاندنا خۆ بدەت و خۆ ماندی بکەت و ئاستێ خۆ پێشبێخیت، دا بشێت جڤاکەکێ ساخلەم و پێشکەفتنێ درست بکەت، ژبەر کو قوتابیێ زانکویێ ل باشترین و بهێزترین ئاستێ تەمەنێ خۆ دایە و یێ بەرهەڤە ژ بۆ وەرگرتن و بەخشینا زانست و زانینێ و دشێت ببیتە پرەکا مەزن دناڤبەرا زانکویێ و جڤاکیدا، ئەڤە ژی دبیتە مەزنترین سامانێ هەر مللەتەکی. جڤاک ب چاڤەکێ مەزن و گرنگ تەماشەیی قوتابیێ زانکویێ دکەت و زۆر ب گرنگ تەماشە دکەنێ، ژبەر ڤێژی خەلەتیێن قوتابیەکێ زانکویێ و کەسەکێ ئاسایی ب چاڤەکی ناهێتە دیتن، دبیت بێژن کەسێ ئاسایی تێگەهشتنا وی بۆ بابەتان هەر هندە و ئاساییە شاشیان بکەت، بەلێ قوتابیێ زانکویێ شاشێ ل سەر دهێتە هەژمار کرن و دبێژن ئەگەر قوتابیێ زانکویێ فلان کارێ خراب بکەت، یان فلان شاشیێ دووبارە ئەنجامبدەت، کەسێن ئاسایی هەر چ بکەن ئاساییە، ئەڤجا قوتابیێ زانکویێ خودیکا جڤاکیە، نموونە ئەگەر قوتابیێ زانکویێ یان خواندنا بلند ل ترافیکێن سور بدەت، ڕامانا وێ ئەوە ئانکو کەسەکێ ئاسایی ب خۆ دێ لێدت، ئەگەر دیاردێن کرێت د جڤاکی دا ئەنجامبدەت، رەنگڤەدانا وێ شاشیێ زۆرتر دبیت، ئەڤەژی ئەو راستیە دەما زور جاران دبێژن، زانکو نەشیاینە ببنە مینبەرێن باش بۆ بەلاڤکرنا دیاردە و کەلتورێن باش و پێتڤیە ئاستێ زانستی و مەعریفی ل زانکویان بهێتە بلندکرن، و قوتابی باشتر بهێنە پەروەردەکرن و زانست پێ بهێتە دان. واتە، زانکو مەزنترین و گرنگترین ناڤەندێن هەر وەلاتەکینە، و قوتابیێ زانکویێ کەسەکێ زورێ گرنگێ جڤاکیە و دشێت تێروانینا جڤاکی بو بابەتا بگوهوریت، و هەر چ تشتێ باشە ژ لایێ وانڤە بهێتە پەسەند کرن، و کار بو بکەن، و هەر چ کار و دیاردە و کەلتورێن نە جوان هەنە راستڤەکەن، و کار بۆ نەهێلانا وان بکەن، دا کو دەما ل زانکویێ دەر دچن کەسێن ئاڤا بن و بشێن زێدەتر خزمەتا جڤاک و ئاخ و نەتەوا خۆ بکەن.
