پەیڤە بلق

‎مستەفا عەبدورحمان ئەرەدنی

پەیڤە بلق
‎مەتینێ میتانی
‎هێژ هەست ب ڤولكانا ژێر خۆ
نەكریە
‎داكو هوین مەنجەلێن خۆ
ل سەر بكەلینن ‎هێژ بنێ وی گەرم نەبوویە
‎داكو پڕچە پڕچ و بلقا ژێ بینن
‎ما كەنگی گارەی گازندە
‎ژ خودانێ خۆ كریە؟
‎دا هوین نەفرەتان لێ ببارینن
‎خۆ لێ بكەن خودان و
‎خۆ لسەر بسەپینن
‎ما فەرهادێ ئەڤیندار
‎چیایێ بیستون سم سم نەكربوو
داكو شرینێ ‎د ناڤدا بكەتە شاژن و
‎سؤزا خۆ بجهبینن
‎نەك خۆ تێدا ڤەشێرن
‎پەق وئاڤلەكێن دەستێن وی
‎هەستەسؤزێن وی ڤەدگێرن
‎دەنگێ چەكووچێ وی ‎
گوهێن پاشایا دسمتن
‎زوردار دئینان ئیشتە ئێشتێ
‎هەر وەكو چەكوچێ كاوەی
‎سەرێ زوردارا كریە سندان
‎گەل قورتالكر ژ وێ رڤشتێ
‎لێ چ بكەم؟
‎پەیڤێن هەوە بۆنە پەیڤەبلق
‎وەك پەقیشكا خرِ پەقین
و بتنێ ڤەدانە شلق
‎دوهی هەوە چەرمێ گای
دڕاچاندن ‎
دؤل و گەلی پێ ڤەدگرتن
‎قەپە وقاپە هوین دئاخفتن
‎ سنوور هەوە رادكرن
‎ئەزمان ژ گەلالیشكا دكێشانە
دەر
‎تبلێن هەوە
د ئاخە نەرما بن خۆرستی دا
‎نەدچوونە خوار
‎هوین ل هیڤیێ بوون
‎گیابەندا لاتا
‎ژ بنی بیننە دەر
‎كەهیا ژ واری بكەنەدەر
‎تەحلییا ژ حەفكێ بیننەدەر
‎ لێ گوتنێن هەوە پەیڤە بلقن
‎دگەل نەرمە بایێ سپێدەهییا
‎بەرناگرن و دپەقن
‎هوین ب خیالا دخاپاندینە
‎ب ناڤێن تەیسۆك وێرانكرینە
‎هوین نە (توشراتێ) میتانینە
و نە(كەیخسرەوێ) میدینە
‎نەژی فەرهادن
‎نە ژی كاوەنە ‎
نەژی هەلگرێن چەكووچینە
‎هوین مشكن مشك
د كونان دابخودانكرینە
‎ب فیتییا بلولیلڤانێ مری
‎هەوە خەنجەر ژ كاڤلانا
كێشادەر
‎بوونە سەپان ودەرگەهڤان
‎جۆت راكێشان كەزی
و ئەنیكەڤەر
‎ما چ مایە هەوە نەكری؟
بۆ شاه وسولتانی بوونە چەپەر
‎نە دوهی و نەئەڤرۆ و نەسوباهی
‎كەسێ باوەری ب هەوە نینە
‎هوین ژ باوەریێ بۆنە ڤەدەر
‎پەیڤەبلق و قاپێن هەوە
‎وەكو پەقیشكێن بەنيشتی
‎ب لێڤانڤە دپەقینە
‎ب لێڤانڤە دپەقینە