ناجح بێجانی
ئەڤا هەنێ هوون دبینن یا ل بن دارێ ڕوونشتیيە و دەستێن وێ دبلندن و داخوزا وەکهەڤیێ و دادپەروەریێ ژ مە دخــوازت؛ ل پيش چاڤێن مە هەمیان ڕۆندکان دبــارینیت، ئەڤا هەنێ یا پەیڤێن خۆڕاگریێ د ناڤ مێشک و دلێن مەدا دنڤیسیت، ئەو دایکە یا ل ژێر رەش مالەکا درهایی و بەر رەحما بارانێ و چپچپا دلۆپان ئەم پێگەهاندن، ئەو شێرە ژنە یا بەر سڕوسەقا زڤستانێ و شەڤێن تلچاڤ و دڕێژ دا چیرۆکێن شۆڕەشگێریێ و مێرخاسیێ و حەماسەتێ بۆ مە ڤەدگێڕان، ئەو خویشکە یا بۆ چەندین جاران بەر بەفر و بارانێ ڤه مژوویلی نانپەحتنێ و جاران ژی بالاڤ دکر، جلکێن مە دشووشتین، سۆپا داران گەرم دکر, مە خوە ل بەر زوها دکر بۆ ئێک چڕکە ژی پەشێمان نەبوویە د ئەڤێ رێیا دا تا بگەهینە ئەوێ رۆژێ ئەم ل بەندێ، ئەڤا هەنێ دایکا چار شەهیدانە و ب دەنگێ خوە یێ نازک و زەڵال سەرێ زاڤایی ژ مەرا ڤەدلۆرینیت، ئەڤە ئەو شێرە ژنە مامۆستایە کوردپەروەرە خودان هەلوەست و سەربۆرە و خۆڕاگرە،لێ مخابن پشتی بەریکێن مە تژی بوون؛ مە چاڤ ب ڤيللە و مەزرەعەو و مۆنیکا و رەنجدرۆڤرا کەفتن مە خوە ژبیر کر، مە هوون ژبیر کرن، دایێ، خالەت، خویشکێ، مەتێ قوربانی چاڤێن هەوە بم، ئەو دلسۆزی و ڤیان و وەلاتپارێزییا هەوە سۆز و پەیمانێن مە ئێک ناگرن، ژ بەرکو ئەم ئەو شۆڕەشگێر نەبوون یێن د چاڤێن وە دا، چاوا مە زویکا ژبیر کر؟ ئەو پارزینکێ ب پشتا تەڤە ل وان سپێدەھيێن زوی ژ ئەڤی (گەلی بۆ گەلیێ دی و هشار هشار تو دگەریايی ب هێجەتا برنا خوارنێ بۆ شڤانی تە ئەم ژ دوژمنان دپاراستین. خالەت قوربان ئەو پەیڤێن مە یێن خاپینۆک و کریاریێن مە؛ ئەڤرۆکە هەمی بەرزەبوون، ب تنێ مە خوە دیت و مەهوون ژبیرکرن…
