ئازاد عزەت
من خۆ دا بەر تاڤا ڕۆژێ و من دیت هەڤسوویێ من ( راكان) وەکو هەر ڕۆژ یێ ل بەر دەرگەهێ مالا خۆ پەیاسا دکەت و یێ دگەل خۆ دئاخڤیت و جار ژی یێ د هزرادا دچیت.
ئەز چوومە بەردەرگەهی و من گازی کرێ:
– وەرە دەف من، تەخێرە؟ ئەڤە نێزیکی هەفتییەکە تو یێ دڤێ ڕەوشێدا؟
– راكانێ هەڤسوو گۆت: تو ڤێ ڤالاهییا دناڤبەرا خانییێ من و خانییێ خوه دا دبینی؟
– بەلێ، ئەز دبینم، ئێ…
– من یێ پەرژان کری و هندەک کەسکاتی یێ لێ چاندی، هەڤژینا من یا دبێژیت: جامێرۆ تو ئەڤی جهی نەهێلە، تە زەحمەت یا پێڤە بری.
– من گۆتێ: ئێ.. بابەت چییە؟
– کارمەندێن سەرۆکاتییا باژێرڤانییێ ب سەردا گرت و خراب کر و ئەز دگەل خۆ برمە باژێرڤانییێ، من و ڕێڤەبەری گفتوگویەک کر، ڕێڤەبەری د دووماهیک ئاخڤتنا خوه دا گۆتە من، تو ڤێرێ چۆل نەکەی دێ ب خرابی بۆ تە زڤڕیت.
من گۆتە هەڤسۆیێ خۆ:
– ئەرێ ما تە نە گۆتێ ڤێرە یا ڤاڵایە و ملکێ هەوەیە هەردەما هەوە گۆت مەیێ فرۆشتی ئەز دێ پەرژانێ خۆ ڕاکەم؟
راكانی گۆت:
– ئمممم، نەخێر… من وە نە گۆتێ.
– بۆچی راكان، تە نەگۆتێ؟ ئەرێ تە ئەڤ هزرە نەکر یان ژی ئەگەرەکێ دیتر هەیە؟
– دەمێ من گۆتییە سەرۆکێ باژێرڤانییێ ئەڤ جهە یێ ڤاڵایە وی ئێکسەر و ب هێز دەستێ خۆ ل مێزا خوه‌دا و ب دەنگەکێ بلند گۆت: دەرکەڤە، ئەو تشتێن ل سەر مێزا وی هەمی ل سەر جهێ خۆ چوون، گازی پۆلیسان کر و گۆت: ڤی ل پێش چاڤێن من نەهێلن. و ئەز ل ژوورێ دەرێخستم.
من گۆتێ: وپاش تە چکر؟ تو چوویە کیڤە؟ تە بەرێ خۆدا کیڤە؟
– ئەز نەچوومە چ جهەکێ، بەلێ ئەڤا تە بۆ من گۆتی دێ چمە ڤ وێرێ هەمیێ بۆ بێژم.
– باشە جیران، بەلێ ئەڤێ جارێ تو ل سەر نامیلکەکێ بنڤیسە و بگەهینێ، چاڤەرێ بە کا دێ چ خەبەرەک هەبیت.
رۆژا دی من راكان د ھەمان رەوشێدا دیت، من گازی كرێ:
– ھا جیران تە چ كر؟
ل من زڤری، بەرەڤ من ڤە ھات و گۆت:
– من ئەڤرۆ دگەل هەڵاتنا ڕۆژێ کاروبارێ خۆکر و بەرەڤ باژێرڤانیێ ڤە چووم، ل پرسگەهێ چاڤەرێی ڕێڤەبەری بووم.دەمێ هاتی و چاڤێ وی ب من كەفتی، گۆت: دیسان تو؟ سەرێ خوه هژاند و چوو. پشتی بۆرینا سیھ خۆلەکان چوومە دەف، بێیکو داخوازییا من بخۆینیت، پرت پرت کر و هاڤێتە دناڤا سەبەتا گلێشیدا ودوبارە گازی پۆلیسان کرەڤە و ڕەفتارەکا نەجوان دگەل من کر. گۆتە من ئەو پاتێن تە برینە شەلوالێ خوه جوان بشۆ داکو تو ژی جوان ببی.
راكان ل بەر دیۆارێ مالێ ڕوونشت و سەح دکرە کەسکاتیێن خوه و چاڤێن وی تژی ڕۆندک بوون، گۆت:
– هەژاری بەڵایا سەردونیایێ یە بۆ مرۆڤێن نە تێگەهشتی، ژیان گەلەکا ب زەحمەت کەڤتی، باژێرڤانی گوهدارییا من ناکەت و سەرەدەریەکا کرێت دگەل من دکەت و من ئەو داخوازییا خوه گەهاندنێ ، بەلێ ب چڤە وەرنەگرت.
– ئێ باشە، دووبارە بزاڤێ بکەڤە، بەلکو گوهدارییا تە بکەت.
رۆژا دی من راكان دیتەڤە و من پرسیار ژێ كرەڤە كا چ لێ ھات، گۆت:
– جارەکا دی چوومە باژێرڤانییێ ڤە،بەلێ زێرەڤانان نە هێلا بچمە دناڤا ئاڤاهیدا و گۆتنە من: ئێدی تو نەشێی بهێیە ڤێرە هەرە بۆ مە و هەروەها بۆ خوه ژی چ ئاریشەیان دروست نەکە داکو ئەم ڕۆژا خوه و کارێ خوه ب دروستی و دلخۆشی ئەنجام بدەین.
من دیت ب دلەكی شكەستی زڤرییەڤە و ڕۆخسارێ وی وەستیایە ، گەلەك پرسیار د دێمێ ویدا خویادكرن:
– هەڤسوویێ من، ئەرێ ما ئەوێ خودان باوەرنامە بیت ما ئەو خودان وژدانە؟ ما زانایە؟ دادپەروەرە؟ گوهدارێ هەژارو بەلەنگازانە؟
– بێ گومان، نه‌خێر.
– هۆ هۆ جیرانۆ، هه‌تا ئێك هه‌بیت ئه‌ز بۆ باخڤم، به‌لێ خوزیا من ئه‌وه دارا من نه مینیت خرش.
پێنگاڤه‌كێ چوو پێش وب پوسیده‌ڤه ده‌ستێن خوه بلندكرن و گوت:
– ئه‌ی خودا ئه‌ڤێن گۆھ خودان گۆھ بێخه.
