سەروین سەلیم حیدو
بەشێ پەروەردا گشتی
زانکۆیا جیهان -دهۆک
ئەو دەمێن دگەل دەستپێکا پەیدابوونێ دەستپێدکەن ئەو ب بهاترین دەم ل قەلەم دهێنە دان پتر ژ هەر دەم و گاڤەکێ، ئەو دەمێن ب نیاسینا خودانێن پەیدابوونا تە و ئەگەرێ هاتنا تە ژ بۆ دونیایا وان، ئەو دەمێن ژ یاقوت و مەرجانان دەربازدبووین کۆ گرین و گرنژینا وان ژ بۆ مە بوو، دەستێن پڕ ژ ئەشق و ڤییانێ ژبۆ ڕوح و گیانێ مە بوون، ئەوێن ب هەبوونا وان فێری کەفتن و ڕابوونا بووین، فێری جەنگ و ئازادیێ بووین، ئەوێن ژ بۆ تە بووینە دەست و پێ دهەردەمەکێ گران و ئالوز دا ،ئەوێن بۆ تە بووینە چاڤ ژ بۆ دیتنا پاشەڕوژێ، ئەوێن بۆ تە بووینە ئاواز و ستران ژ بۆ ڤەڕەڤینا خەم و ئازارێن تە، و ل ڕوژەکێ پێدڤییە فێری نەبوونا وان ببی و ئێدی ببیە (دانعەمرەکێ گوپاڵ هەلنەگرتی) و دزاروکینییا خوە دا نە مینی و چاڤێن مەزنییێ لسەر ژیانێ ڤەکەی، ب نەبوونا وان ب بیرهاتنێن وان یێن پڕ ژ پاقژییا ڕوحانیەتێ و پڕ ژ دلوڤانی و میهرەبانییێ، دێ تێگەهی ئێدی هوین ددویرن ب دویراتییا ئەرد و ئاسمانان، ئەو دڕاستیێ دا دژین و تۆ د خەیالێن بیرئینانان دا دژی وەکی ئەوێ کوترا ل ئاسمانی دفڕیت و نەزانیت ئاراستێ ڕێکا وێ بۆ کیڤەیە! ب نەبوونا هەردوو چاڤان ڕێک ب ڕوحێ ژی روون نابیت، چونکی ب هەبوونا وان هەمی دونیا یا ڕوهن و گەش بوو، د هەر باهۆز و باڕوڤەکێ دا ئەو وەکی ڕوناهییا بەهەشتێ بوون، ئەو د پاک وڕاستگۆ بوون دهەر پاشڤەبرنەکا مەدا، سەڕەڕای زەحمەترین دەمێن خودا، ئارمانج ئارامبوون و دلخوشیا مە بوو، د دووراتییا وان دا بتنێ دێ فێری هندێ بی کۆ ئەو بووتە ستووین بوون، ب هەبوونا وان چ کێماسیا دەرگەهێ تە نەقوتابوو، لێ ب نەمانا وان ب تنێ تۆ ئاڤاهییەکێ خالی و بێ ئەزموونی ژ ئەزموونێن دونیایێ، ئەو هەبوون هەر تشتەک د هەبوونێ دا بوو ، دگەل نەمانا وان هەر تشتەک بن ئاخ دبیت، ب نەبوونا وان هێدی هێدی دێ ئاڤاهیەک ئاڤابیت کۆ یێ ڤالایە ژ ستووین و بێهنا مسک و عمبەران، لێ تژی و داگرتی ژ خەم و ڤەقەتیانا دەمارێن دلا، ئەو دەمارێن ب هەمی موکمی و د ماوێ (9) هەیڤێن ژ زەحمەتا دایکەکێ و خوینا بابەکیدا هاتینە گرێدان و ئاها هوسا جوان خودایێ مەزن مە فێری بێهنفرەهیێ دکەت لسەر دویربوونا وان. ئەو ڕاستییا گەلەک تەحل و گران، کۆ ئەو دبێژیت ئارامگرتن لسەر نەخوشییان مەزنترین پاداشتان لدویف خۆ دا دینیت، دجوانترین گوتنا خۆ دا ئەو دلا ڕادکیشیت بەرەف سەبر و ئارامیێ، (وَلَنَبْلُوَنَّكُمْ بِشَيْءٍ مِّنَ الْخَوْفِ وَالْجُوعِ وَنَقْصٍ مِّنَ الْأَمْوَالِ وَالْأَنفُسِ وَالثَّمَرَاتِ وَبَشِّرِ الصَّابِرِينَ”الذين إذا أصابتهم مصيبة قالوا إنا لله وإنا إليه راجعون أولئك عليهم صلوات من ربهم ورحمة وأولئك هم المهتدون)(سورة البقرة: 155-157).
ئاها ئەڤەیە مەزنی و دلوڤانییا خودێ کۆ دهەر دەم و گاڤەکێ دا ئەو ژ خوەزاییا خوە میهرەبانێ میهرەبانانە و ژجوانیا ئەڤێ گوتنێ ئەوە کۆ مە فێردکەت هەمی تشت بدەست خودایێ مەزنن و دهەر گاڤ و دەمەکی دا ئەو باشترینێ ژبۆ بەندەيێن خوە د هەلبژێریت و ئەو زانایە دهەر کریارەکێ دا.
