محه‌مه‌د مراد
په‌رتووكا (ئه‌م و كه‌ر) د رێكه‌كا پڕی ئاسته‌نگ و مه‌رترسی دا، یا نڤیسه‌رێ یه‌مه‌نی (محه‌مه‌د مسته‌فت عومڕانی) ل دۆر نه‌خۆشیێن گوندێ خۆ و كێشانا ئاڤا ڤه‌خوارنێ بۆ مالان دبێژیت، گوندییان بڤێن و نه‌ڤێن چ سه‌رچاڤكیێن ئاڤێ نه‌بوون، دڤێن د وێ رێكا سه‌خت و مه‌ترسی ڕا ده‌رباز بن و ل هنداڤ نهاله‌كا كویر، بچن ئاڤێ ب كه‌را بینن، كو چه‌ند زارۆك ژی ب كه‌رێن خۆڤه د وێ رێكێ ڕا مربوون.
پشتی ب كه‌ر ڤه كه‌ڤتین د نهالا كویر دا، پشتی ده‌ه یان سالان، رویهسپیێن گوندی كۆمبوون كو چاره‌كێ ببینن و ل ماله‌كێ كۆمبوون، ل دۆر رێكێ دئاخفتن، كا دێ چاوا چاره‌كێ بینن وێ ئاریشێ چاره‌سه‌ركه‌ن، نڤیسه‌رێ په‌رتووكێ ئه‌و ب خۆ ژی خه‌لكێ گوندی بوو، كو چه‌ند جاران د وێ نهالێ دا كه‌فتی، ده‌مێ بچویك و ژ مرنێ قورتال بووی، گۆت وان كه‌سایه‌تی و رویهسپییان بۆچی ئه‌م رێكا خۆ ناڤهه‌گوهێزن ئه‌وا دچیت كانیا ئاڤێ؟، رێكه‌كا ب سلامه‌ت و بێ ترس، هه‌ر وه‌كو بریسكێ ل وان رویهسپی و كه‌سایه‌تیان دای، ب دلێ وان نه‌بوو، به‌رسڤ دان و گۆتن ئه‌م دێ ل دویڤ كه‌را چین و بلا ئه‌و رێكا نیشا مه بدن.
وانه‌ك ژ ڤێ سه‌رهاتیێ
نهو ژی به‌هرا پتری كارێن مه د گوند و باژێران دا وه‌ك كولتووری لێ هاتیه، هه‌ما كه‌سێ ئێكێ چ بێژێت، دێ ئه‌وبیت، خه‌له‌ت بیت و دورست بیت دێ ئه‌و بیت یا ئه‌وی گۆتی، پێكڤه ناروینن خار و پێكڤه گه‌نگه‌شا بابه‌ته‌كێ بكه‌ن، كا چ باشه بۆ ڤی گوندی یان ڤی باژێری یان هه‌تا ڤی كه‌سی ژی، كه‌سێ ئێكێ ژی گوهدارییا ده‌وروبه‌ران ناكه‌ت، دێ بیژیت ئه‌وا ئه‌ز دبێژم بۆ به‌رژه‌وه‌ندییا گشتی و سه‌ركه‌فتنا گوند و باژێرێ یه و خزمه‌تكرنه، تنێ دا سه‌ركه‌فتن بۆ وی كه‌سی بیت، ئه‌گه‌ر زه‌ره‌ر و زیانێن وێ ده‌ه یان ملیۆن دۆلار بن یان سه‌دان كه‌س ژی بمرن، نه گرنگه یا گرنگ خزمه‌تكرنه و سه‌ركه‌فتنا كه‌سێ ئێكێ یه، ل ده‌ف كابرای تنێ خزمه‌ت و نمایشكرنا خۆ بۆ ده‌وروبه‌ڕان دیاربكه‌ت، ئه‌ز ئاقلدارێ وه‌مه؛ نابت د یدوبۆچوونێن وه ل پێشیا دید و بۆچوونێن من بن.
هۆسا و ب ڤێ تێگه‌هشتنێ و رێڤه‌بڕنا سه‌قه‌ت چه‌ندین قوربانیێن مادی و مه‌عنه‌وی دهێنه‌دان تنێ بۆ هندێ دا گۆتنا سه‌یدای نه‌هێته كێمكرن و ته‌رككرن، له‌وا دێ به‌رده‌وام بن ل سه‌ر رێیا كه‌ر تێرا دچت و نه‌شێت بگوهۆڕن،حه‌تا قوربانیێن ڤێ رێیا خه‌له‌ت دبنه گه‌له‌ك!
