نایف مه‌حموود
گه‌له‌ك جاران ئه‌م به‌حس ل ڤی وه‌ختی دكه‌ین وه‌كو سه‌رده‌مه‌كێ سه‌یر، بۆچی سه‌رده‌مه‌كێ سه‌یر؟ بۆچی دكه‌ڤینه د ناڤ ده‌ستێن قه‌ده‌رێ دا و هه‌ما چ هاته ڕێكا مه دێ ئه‌وبیت؟ ئه‌ڤ گێله‌شۆكا نها ئه‌م تێدا پێدڤی ب هه‌لوه‌سته‌یه‌كێ جدیه وه‌ك مژار بێخینه به‌رده‌ستێ خوانده‌ڤانی و جڤاكا خوه. ئاشكه‌رایه هه‌رده‌مێ هزر و وژدانا مرۆڤان به‌ر ب خیانه‌تێ و داڤ دۆزیێ ڤه چوو ل وی وه‌ختی دێ دونیا بیته دونیایه‌كا سه‌یر، دێ هنده‌ك ژ نموونه و بۆیه‌ر و سه‌ربۆڕێن ئه‌نتیكه د ژیانا خوه دا بینین. مرۆڤبوون واته ژیان، دلۆڤانی، وژدان، وه‌فاداری و ڕاستگۆیی، گه‌ر ئه‌م ژ قالبێ مرۆڤبوونێ ده‌ركه‌فتین و بووینه كاره‌كته‌رێن به‌ژن و بالا خوه بتنێ و مه مرۆڤایه‌تی بۆ به‌رژه‌وه‌ندیا خوه بكارئینا دێ سه‌رده‌مه‌كێ سه‌یر ژێ ئافریت و هنده‌ك میناك دێ په‌یدا بن كو ئه‌قل پێ مه‌نده‌هۆش ببیت. ئه‌ڤ میناكێن د دۆرهێلێ مه‌دا چێدبن یێن دبنه جهێ حێبه‌تیێ د ناڤ مه‌دا و ب ڕاستی وژدانا مرۆڤی دهه‌ژینن ئه‌و نموونه‌نه ده‌مێ هنده‌ك مرۆڤ دبنه پاله‌وانێن ئه‌نجامدانا ڤان كریاران! ڤێجا ژ وان تشتێن سه‌یرێن سه‌رنجا من ڕێكێشای جاره‌كێ ل پیشانگه‌ها ترۆمبێلان، ده‌مێ چوویم پیشانگه‌هێ و چه‌نده‌كێ ل چه‌ند پێشانگه‌هان گه‌ڕیایم و هنده‌ك ترۆمبێل من بازاڕكرین، ئێكسه‌ر هنده‌ك گۆمانێن زیق یێن هنده‌ك فێلبازی و ته‌شقه‌لان بۆ من دیاربوون، ل وه‌خته‌كی چووم گۆره‌پانه‌كا پێشانگه‌هان من ترۆمبێله‌ك بازاڕكر خودانێ ترۆمبێلێ دوماهیك بها یێ وێ دا من و ل دووماهیێ ئه‌م پێك نه‌هاتین، پاشی چووم من ڕێكا خۆ ڤه‌گوهاست بۆ لایه‌كێ دی یێ پیشانگه‌هان و چوومه جهه‌كێ دی و من پسیاركر فلان جۆرێ ترۆمبێلێ من دڤێت، ده‌ملده‌ست ئێكی گۆت هه‌ڤاله‌كێ من ئێك یا هه‌ی به‌لێ نائینیته پێشانگه‌هان، هه‌ما سودفه هه‌كه بازاڕه‌ك هات دفرۆشیت چونكی یا مالێ یه! گۆت هه‌كه ته بڤێت دێ نوكه په‌یوه‌ندیێ پێكه‌م بهێته ڤێرێ، من ژی ژ دلێ خۆ یێ سافی گۆتێ بێژێ بلا بهێت به‌س به‌ری بهێت گۆته من باوه‌ركه بهایێ دوماهیێ هنده‌یه و قفله، من ژی گوتێ جارێ بلا بهێت دێ بازاڕه‌كی كه‌ین هه‌كه قسمه‌ت بیت وێ گاڤێ خودێ كه‌ریمه، گۆتی برا هه‌وجه ناكه‌ت، باوه‌ركه ترومبێل یا مالێ یه و هه‌ما شێوازێ فرۆتنا وێ ژی ب ڤی ڕه‌نگی یه، من ژی گۆتێ بلا بهێت، د وه‌خته‌كی دا من دیت ترومبێله‌ك هاته د وێ پێشانگه‌هێ ڤه یا ئه‌ز لێ، كابرایێ دی گۆته من ئه‌ڤ ترومبێله‌یه و شۆفێر هاته خارێ، هوۆمن دیت ده‌ركه‌ت هه‌ر ئه‌و ترومبێل یا من به‌ری هینگێ بازاڕ ل سه‌ر كری و هه‌ر كابرایه شۆفێرێ ترومبێلێ! هه‌لبه‌ت پێنچ وه‌ره‌قان زێده‌تر ژ وی بازاڕێ به‌ری هینگێ مه كری، من گۆته وان براده‌ران مه به‌ری نوكه بازار یێ ل سه‌رڤێ ترومبێلێ كری و هه‌ر ئه‌ڤ براده‌ره‌بوو یێ نوكه حازر و ب ڤێ قیمه‌تێ!، د وی ده‌میدا كه‌فتنه هه‌لوه‌سته‌كێ موحرج و شه‌رمزاری بخێربهێت، ل دوماهیێ ده‌ركه‌فتن باب و كۆڕ د ڤێ پلانێدا ده‌سته‌كن، وه‌ختێ من ب ڤی ڕه‌نگی دیتی، هه‌ژیه بێژم من ئه‌ڤ هه‌لوه‌سته ژ پێش وانڤه گه‌له‌ك نه‌خۆش بوو، ئه‌ز ژی ب سه‌رخوه‌ڤه هاتم و من گۆته وان خۆزی هۆسا چێنه‌ببا، هه‌لبه‌ت ئه‌وژی تووشی سه‌دمه‌كێ بوون، من گۆتێ هوین خێرێ ژ ترومبێلا خۆ ببینن و ئه‌م برایێن ئێكین، ئه‌و د په‌یامێ گه‌هشتن، له‌وا گه‌ر دیوار ل سه‌ر ڕاستیێ وژدانێ و مرۆڤبوونێ نه‌هێته ئاڤاكرن دێ زی هه‌ڕفیت و سه‌رده‌مه‌كێ سه‌یر دێ ژێ چێبیت و ده‌مێ ئه‌م دبێژین به‌ندكێ دره‌وان ژی یێ كورته، ئه‌ڤه ژ ڤاڵاهیه‌كێ نه‌هاتیه. ئه‌ڤجا ب سه‌دان و ب هزاران نموونویێن ب ڤی ڕه‌نگی د ژیانا مه یه ڕۆژانه دا هه‌نه و كڕین و فرۆتن و بازرگانی یا بوویه په‌له‌ك مرۆڤ جورئه‌ت ناكه‌ت ده‌ستێ خوه بكه‌تێ. ڕه‌نگێن فێلبازیان، حیله و ته‌شقه‌لان یێن سه‌رهلداین و هنده‌ك یێن بووینه گورگ و كه‌فتینه كه‌ڤلێ خه‌لكی و گوشتی ژ هه‌ستیان ڤه‌دكه‌ن. داكو بابه‌ت دڕێژ نه‌بیت ئه‌گه‌ر نموونێ ژ ڤێ زیقتر د جڤاكا مه دا ریداینه و خه‌لك یێ بوویه تۆمكێ ده‌ڤێ هنده‌ك فێلبازان و هیچ دلۆڤانیێ پێ نابه‌ن و ب ڤی ڕه‌نگی خوه ده‌وله‌مه‌ند دكه‌ن، یا ژ وانڤه ئه‌ڤه یه سه‌ركه‌فتن و شاره‌زایی، نه‌خێر به‌لكی ئه‌ڤه گۆپیتكا بێ وه‌فایێ یه، گوپیتكا نه‌پاكیێ یه، به‌لێ یا گرنگ دڤێت د هشیار بین و نه‌كه‌ڤینه داڤێن ڤان ته‌لهان و ڤان جۆره مرۆڤان چاوا بڤێت وه‌سا ل سه‌ر مه بچه‌قین، بازاڕێ حه‌لال و ب ڕاستگۆیانه مافێ هه‌ركه‌سه‌كی یه بو خوه مفای و قازانجێ ژێ بكه‌ت، لێ ب ڤان جه‌مبازیان ڕۆژه‌ك دێ هێت ئیلا فلم و سیناریو دێ ئاشكرا بن و ڕوی دێ ڕه‌شبن. یا نه‌خۆش و جهێ دل ته‌نگیێ ده‌مێ خه‌لكه‌كێ هه‌ژار و دل ساخ و هه‌روه‌سا ئه‌وێن باوه‌ریێ د ده‌نه یێ به‌رامبه‌ر د بازاڕكرن و كڕین و فرۆتنێ دا، ئها ب ڤی ڕه‌نگی ئه‌م یێن كه‌فتینه د ده‌ستێن قه‌ده‌رێ دا و ئه‌ڤ جۆره پیلانه یێن بووینه به‌شه‌ك ژ ڤێ ژیانا مه یا ئه‌ڤرۆ، ڤێجا سه‌رده‌مانێن بهێن ژی كا دێ به‌ر ب چ پێل و پیلانێن مرۆڤێن دلپیس و فێلباز كه‌ڤین، ژبه‌رڤێ نه‌خۆشیا كه‌فتیه گیانێ به‌شه‌ك ژ خه‌لكه‌كێ بێ به‌خت، له‌ورا خوازیارین بزڤڕنه هۆش و عه‌قلێ خوه یێ دروست داكو جڤاكا مه ببیته نموونه‌یه‌ك ژ جڤاكێن پاقژ و ساخله‌م د كڕین و فرۆتن و سیك و بازاڕان دا.
